ما تصاحبش بلا تجربة

Prompt

الذِّيبْ يَبْقَى دَايْمَنْ ذِيبْ .. وَاللَّهْ وَتْسَكْنُو فِي قَصْرْ وَلْدْ الأَصْلْ مَا فِيهْ عِيبْ .. عَمْرُو مَا يَآذِي وِيْضُرّْ لَكْرِيمْ دِيرُو لِيكْ حَبِيبْ .. وِاللَّئِيمْ فِي وَجْهُو يْبَانْ شَرّْ احْذَرْ مِلِّي يْكُونْ قَرِيبْ .. هَاذَاكْ لِّي يَخْدَعْ وِيْغْدُرّْ الْخَدَّاعْ حَالُو صْعِيبْ .. كَالْكَلْبْ يَظَلْ يَنْبَحْ وِيْهَرّْ لَمْنَافِقْ يَجِيكْ بِالطِّيبْ .. وْهُوَ يُخَبِّي فِي قَلْبُو لَمْنْكَرْ تَفْتَحْلُو لْسَانَكْ وَالْجِيبْ .. وْتْظَلْ تَمْدَحْ فِيهْ وِتْشْكُرّْ يَقْضِي صَالْحَة وِيْغِيبْ .. وْفَالشِّدَّة يُخَلِّيكْ مُوَدَّرْ مَا يَنْفَعْكْ لَا بْكَا لَا نْدِيبْ .. وِتْبَقَّى فِي حَالِكْ مُحَيَّرْ مَا تْصَاحَبْشْ بْلَا تَجْرِيبْ .. وِلِّي مَا جَرَّبْ رَاهْ يَخْسَرْ قَالْكْ لِّي جَرَّبْ مَا يَخِيبْ .. وَالنَّاسْ بِهَادْ لَمْثَلْ تَهْدَرْ الْبَعْرْ مَا هُوشْ كَالزَّبِيبْ .. شْتَا جَابْ الْغَالِي لِلْبَايِرْ وَالْعَسَلْ مَاشِي حَلِيبْ .. كَالْمَا تِشْرَبْ مِنْوُ وِتْعَمَّرْ شْحَالْ مِنْ فْطِينْ وِلَبِيبْ .. رَاهُمْ خَدْعُوهْ الْمَظَاهِرْ صَاحْبَكْ هُوَ الْجِيبْ .. يَقْضِي صْوَالْحَكْ وِيْدَبَّرْ مَا يَخُونْكْشْ كِي تْغِيبْ .. وَلَا كِي تْرُوحْ وِتْسَافَرْ وَلَا كِي تْكُونْ كَئِيبْ .. عَيَّانْ وَمَا طِيقْشْ تْعَافِرْ الدَّرَاهِمْ أَمْرْهُمْ عَجِيبْ .. يَصْنْعُو الطَّرِيقْ فَالْبَحْرْ بِيهُمْ كُلَّشْ يُولِّي قَرِيبْ .. يَجِيكْ فِلْحِينْ وِيْحْضَرْ تْحَلَّقْ بِيهُمْ فِالسَّمَا كَالطَّيْرْ .. وِانْتَ زَاهِي وِتْفْتَخِرْ وِالَّا دَرْتْ بِيهُمْ الْخَيْرْ .. اسْمَكْ فِي كُلْ مْكَانْ يَنْذْكَرْ بِالصَّدَقَة عْلَى لَفْقِيرْ .. يَتْرَفَّعْ مَقَامَكْ وِتْنْشْكُرّْ وَالصَّدَقَة مِنْهَا تْحَيَّرْ .. تَحْفَظْكْ لِيُومْ وِتْنْفَعْكْ فِلْقَبْرْ تَدْفَعْ مْصَايِبْ كْثِيرْ .. وِتْغَطِّيكْ بْلْبَاسْهَا وِتْنْسْتَرْ وَمَا تْعَانَدْشْ الْبَخِيلْ .. وَالْمِشْحَاحْ ذَاكْ الْمْزَيَّرْ هُوَ غَنِي وِيْعِيشْ قَلِيلْ .. غِيلْ مَاتْ وْسَكْنْ الْقَبْرْ تْشُوفُو دَايْمَنْ ذَلِيلْ .. عَلَى الْمَالْ حَالْتُو تَتْغَيَّرْ وَلْحَاسِدْ قَلْبُو مُغْوَدَّدْ .. مِلْحَسَدْ لِّي فِيهْ بَاغِي يَنْفَجِرْ مَا طَاقْشْ يَظَلْ يَسْهَدْ .. وِبْنِعْمَتْ اللَّهْ يَجْحَدْ وِيْكْفُرّْ يَدْخُلْ عْجْلَانْ لِلْمَسْجِدْ .. يُصَلِّي مَعَ النَّاسْ وِيْكَبَّرْ مَا يَرْضَى عَلِيكْ لْحَاسِدْ .. حَتَّى يْشُوفَكْ مُحَطَّمْ وِمْكَسَّرْ هَادَا طَبْعُو شِينْ وْفَاسِدْ .. وَمَا يَرْبَحْ وَالُو فِي لَاخِرْ وَالظَّالِمْ عَمْرُو لَا يُفْلَحْ .. فِي هَادْ الدُّنْيَا وَلَا يَنْتَصِرْ وِلِّي مَا فِيهْ خَيْرْ مَا يَصْلَحْ .. وِينْ مَا رَاهْ يَتْعَثَّرْ وَالصَّالِحْ بْنَسْبُو يَفْرَحْ .. وْوَجْهُو بِالذِّكْرْ مُنَوَّرْ شْتَا جَابْ الْمَا الصَّافِي .. لِذَاكْ لِّي بِالطِّينْ مُعَكَّرْ هَادَا لِلْعَطَشْ كَافِي .. وِذَاكْ تَمْرَضْ مِنْوُ وِتْنْضَرّْ مَا تْضْحَكْ عْلَى الْحَافِي .. كُلْ إِنْسَانْ عَلِيهْ تَتْقَدَّرْ الأَيَّامْ تْبَيِّنْ لْخَافِي .. وَاللِّي كَانَتْ مَجْهُولَة تَظْهَرْ وَلْجَايِحْ ذَاكْ لْكَافِي .. يَظَلْ يَعُسّْ فَالنَّاسْ وِيْقَابِرْ جَاهَلْ مَا هُوشْ مُثَقَّفْ .. وَالْجَهْلْ مْشَاكْلُو يَاسِرْ يْجَادِلْ بْلَا مَا يَعْرَفْ .. وَفِي كُلْ مَعْرَكَة خَاسِرْ رَافَعْ رَاسُو مُشَنَّفْ .. مَا عَنْدُو لَا قِيمَة وَلَا قَدْرْ مِلْحَاجَة التَّافْهَة يِزْعَفْ .. وِمْكَلَامْ النَّاسْ يَتْأَثَّرْ